საინვენტარიზაციო გეგმა არის ტექნიკური აღრიცხვის არქივში აღრიცხული მიწის ნაკვეთის გრაფიკული მონაცემების ამსახველი დოკუმენტი, რომელიც შეიცავს ინფორმაციას მიწის ნაკვეთის ფართობის, კონფიგურაციის, დანიშნულების, ასევე მიწის ნაკვეთზე განთავსებული შენობა-ნაგებობების შესახებ.

საინვენტარიზაციო გეგმის მომზადება ნიშნავს საჯარო რეესტრის ეროვნული სააგენტოს მიერ ტექნიკური ინვენტარიზაციის არქივის მონაცემების საფუძველზე, არქივში აღრიცხული მიწის ნაკვეთის გრაფიკული მონაცემების ამსახველი დოკუმენტის (მიწის ნაკვეთის ნახაზის) გაცემას.

საინვენტარიზაციო გეგმის მომზადება საჭიროა იმ შემთხვევაში, როდესაც პირს სურს  ტექნიკური ინვენტარიზაციის არქივში აღრიცხული მიწის ნაკვეთის გრაფიკული მონაცემების (მიწის ნაკვეთის ფართობი, კონფიგურაცია, დანიშნულება, ასევე მიწის ნაკვეთზე განთავსებული შენობა-ნაგებობების) ამსახველი დოკუმენტის მიღება.

აღნიშნული სერვისი განკუთვნილია ნებისმიერი პირისთვის, რომელსაც რაიმე მიზნით სურს ტექნიკური აღრიცხვის არქივში აღრიცხული კონკრეტული მიწის ნაკვეთის გრაფიკული მონაცემების შესახებ ინფორმაციის მიღება.

საინვენტარიზაციო გეგმის მომზადებისათვის მიმართეთ იუსტიციის სახლს ან შესაბამის ტერიტორიულ სამსახურს.

თან იქონიეთ შემდეგი დოკუმენტები:

• განცხადება;
• პირადობის დამადასტურებელი დოკუმენტი;
• მომსახურების საფასურის გადახდის დამადასტურებელი დოკუმენტი (გადახდა შესაძლებელია ადგილზე);

იმ შემთხვევაში თუ სარეგისტრაციო სამსახურს მიმართავს დაინტერესებული პირის წარმომადგენელი, განცხადებას თან უნდა ერთვოდეს სათანადო წესით დამოწმებული  წარმომადგენლობის დამადასტურებელი დოკუმენტი და დაინტერესებული პირის პირადობის დამადასტურებელი დოკუმენტი.

კონკრეტულ შემთხვევაში შეიძლება დამატებით მოთხოვნილ იქნეს ნებისმიერი დო­კუ­მენტი ან ინფორმაცია, რაც აუცილებელია გადაწ­ყვე­ტი­ლების მისაღებად.

სარეგისტრაციო წარმოების ვადის ათვლა იწყება განცხადების რეგისტრაციის მომდევნო დღეს და მთავრდება ვადის ბოლო დღის გასვლასთან ერთად. თუ ვადის ბოლო დღე ემთხვევა უქმე ან დასვენების დღეს, მაშინ ვადის ბოლო დღეს წარმოადგენს მომდევნო სამუშაო დღე.

შენიშვნა:  საჯარო დაწესებულების მოთხოვნის შემთხვევაში  აღნიშნული მომსახურება ხორციელდება „საჯარო რეესტრის შესახებ" საქართველოს კანონით დადგენილი მომსახურების საფასურის გადახდის გარეშე.