რეგისტრაცია ნიშნავს სუბიექტის წარმოშობის, რეგისტრირებული მონაცემების ცვლილების და რეგისტრაციის შეწყვეტის შესახებ ინფორმაციის აღრიცხვას მეწარმეთა და არასამეწარმეო (არაკომერციულ) იურიდიულ პირთა რეესტრში, შესაბამისი გადაწყვეტილების მიღებით.

სუბიექტი წარმოშობილად, რეგისტრირებული მონაცემები შეცვლილად, რეგისტრაცია შეწყვეტილად ითვლება მეწარმეთა და არასამეწარმეო (არაკომერციული) იურიდიული პირების რეესტრში რეგისტრაციის შესახებ გადაწყვეტილების ძალაში შესვლის მომენტიდან.

რეგისტრაცია გულისხმობს სუბიექტის წარმოშობის, რეგისტრირებული მონაცემების ცვლილების და რეგისტრაციის შეწყვეტის შესახებ ინფორმაციის აღრიცხვა მეწარმეთა და არასამეწარმეო (არაკომერციულ) იურიდიულ პირთა რეესტრში, შესაბამისი გადაწყვეტილების მიღებით.

რეესტრში სავალდებულო რეგისტრაციას ექვემდებარება სარეგისტრაციო განაცხადის/წესდების მონაცემების ცვლილება, კერძოდ, საფირმო სახელწოდების, იურიდიული მისამართის, პარტნიორის (გარდა სააქციო საზოგადოებისა და კოოპერატივისა), წილის (მხოლოდ შეზღუდული პასუხისმგებლობის საზოგადოებისა და კომანდიტური საზოგადოებების შემთხვევაში), ხელმძღვანელობითი/წარმომადგენლობითი უფლებამოსილების მქონე პირის (დირექტორი, თავმჯდომარე, პროკურისტი ან სხვა..), ორგანოს და  სხვა.

რეგისტრირებული მონაცემების ცვლილება ხორციელდება სამეწარმეო საზოგადოების ხელმძღვანელობასა და წარმომადგენლობაზე უფლებამოსილი პირის მიმართვის საფუძველზე, თუ წესდებით ან ამ ცვლილების რეგისტრაციის საფუძვლად წარდგენილი გარიგებით სხვა რამ არ არის გათვალისწინებული.

სუბიექტის რეგისტრირებული მონაცემების ცვლილება ხორციელდება სამეწარმეო საზოგადოების ხელმძღვანელობასა და წარმომადგენლობაზე უფლებამოსილი პირის განცხადების საფუძველზე, თუ წესდებით ან ამ ცვლილების რეგისტრაციის საფუძვლად წარდგენილი გარიგებით სხვა რამ არ არის გათვალისწინებული. აღნიშნული პირის მიმართვის გარდა, საწარმოს პარტნიორის მიერ წილის გასხვისების შემთხვევაში შეიძლება განხორციელდეს აგრეთვე წილის გამსხვისებელი პარტნიორის ან შემძენის მოთხოვნის საფუძველზე, ხოლო მემკვიდრეობის შემთხვევაში − მემკვიდრის/მემკვიდრეების მოთხოვნის საფუძველზე. ასევე, საზოგადოების ხელმძღვანელობაზე და წარმომადგენლობაზე უფლებამოსილი პირის და სამეთვალყურეო საბჭოს წევრის ცვლილების მოთხოვნით განცხადება შეიძლება წარმოდგენილ იქნას ნებისმიერი პარტნიორის მიერ. რეგისტრაციისადმი დაქვემდებარებული სამეწარმეო საზოგადოების კაპიტალში პარტნიორის წილობრივი მონაწილეობის ცვლილება, აგრეთვე წილის მმართველის რეგისტრაცია/ცვლილება შეიძლება განხორციელდეს ასევე შესაბამისი პარტნიორის მიმართვის საფუძველზე.

სარეგისტრაციო დოკუმენტი შესაძლებელია დამოწმებულ იქნეს როგორც სანოტარო წესით, ისე იუსტიციის სახლის, საზოგადოებრივი ცენტრის ან საჯარო რეესტრის ეროვნიული სააგენტოს შესაბამისი უფლებამოსილი თანამდებობის პირის მიერ (გარდა კანონმდებლობით გათვალისწინებული შემთხვევისა).

სამეწარმეო საზოგადოების რეგისტრირებულ მონაცემებში ცვლილების რეგისტრაციის მიზნით უფლებამოსილი პირის მიერ წარემოსადგენია:

• განცხადება;

• უფლებამოსილი პირის იურიდიული ძალის მქონე პირადობის დამადასტურებელი დოკუმენტი.

• უფლებამოსილი პირის/ორგანოს სათანადო წესით მიღებული და დამოწმებული გადაწყვეტილება ან უფლებამოსილი პირების მიერ საქართველოს კანონმდებლობით განსაზღვრული წესით შედგენილი გარიგება რეგისტრირებული მონაცემების ცვლილების თაობაზე;

• კონსოლიდირებული სადამფუძნებლო შეთანხმება;

• მომსახურების საფასურის გადახდის დამადასტურებელი დოკუმენტი;

დაინტერესებული პირის წარმომადგენლის (მინდობილი პირის) მიერ მიმართვის შემთხვევაში, ზემოთ აღნიშნულ დოკუმენტაციასთან ერთად დამატებით წარმოდგენილ უნდა იქნას:

• წარმომადგენლის პირადობის დამადასტურებელი დოკუმენტი (პირადობის მოწმობა, პასპორტი, ბინადრობის მოწმობა ან სხვა);

• სათანადო წესით შედგენილი და დამოწმებული წარმომადგენლობის დამადასტურებელი დოკუმენტი (მინდობილობა ან სხვა);

კონკრეტულ შემთხვევაში შეიძლება დამატებით მოთხოვნილ იქნეს ნებისმიერი დო­კუ­მენტი ან ინფორმაცია, რაც აუცილებელია გადაწ­ყვე­ტი­ლების მისაღებად.

სარეგისტრაციო წარმოების ვადა და საფასური:

• ერთი სამუშაო დღის ვადაში – 200 ლარი;
• განცხადების შეტანის დღეს – 400 ლარი;
• სარეგისტრაციოდ წარდგენილ გარიგებაზე მხარეთა ხელმოწერების დადასტურება – რეგისტრაციის საფასურს ემატება 7 ლარი;
• ამონაწერის ინგლისურ ენაზე მომზადება – 26 ლარი (აღნიშნული საფასური ემატება იმ მომსახურების საფასურს, რომელთან ერთადაც მოთხოვნილია ინგლისურენოვანი ამონაწერის მომზადება);