ნეიტრალური სამგზავრო დოკუმენტი არის მისი მფლობელი პირის პირადობის დამადასტურებელი დოკუმენტი, რომელიც ადასტურებს მის ვინაობას როგორც საქართველოს ტერიტორიაზე, ასევე მის ფარგლებს გარეთ. ნეიტრალური სამგზავრო დოკუმენტის მფლობელი პირი უფლებამოსილია დოკუმენტი გამოიყენოს სამგზარო დოკუმენტად საზღვარგარეთ გადაადგილების და საქართველოში დაბრუნების მიზნებისთვის.

ნეიტრალური სამგზავრო დოკუმენტი გაიცემა აფხაზეთის ავტონომიურ რესპუბლიკასა და ცხინვალის რეგიონში (ყოფილ სამხრეთ ოსეთის ავტონომიურ ოლქში) ლეგიტიმურად მცხოვრებ პირებზე.

ნეიტრალური სამგზავრო დოკუმენტის გაცემის მოთხოვნით დაინტერესებულმა პირმა განცხადება  უნდა წარადგინოს იუსტიციის სახლის ან სერვისების განვითარების სააგენტოს ნებისმიერ  ტერიტორიულ სამსახურში.  

განცხადება ნეიტრალური სამგზავრო დოკუმენტის მისაღებად უნდა წარადგინოს:

• სრულწლოვანმა, ქმედუნარიანმა პირმა პირადად;
• არასრულწლოვანის ერთ-ერთმა კანონიერმა წარმომადგენელმა;
• მხარდაჭერის მიმღები პირის მხარდამჭერმა;
• დაინტერესებული პირის წარმომადგენელმა, წარმომადგენლობითი უფლებამოსილების დამადასტურებელი დოკუმენტის საფუძველზე;
• დაინტერესებული პირის განცხადება ასევე შესაძლებელია წარადგინოს საქართველოში მოქმედმა საერთაშორისო ორგანიზაციამ; 

შენიშვნა:  ნეიტრალური სამგზავრო დოკუმენტის  მიღების უფლება არა აქვს პირს, რომელზეც გაცემულია საქართველოს მოქალაქის პირადობის მოწმობა ან საქართველოს მოქალაქის პასპორტი.

პირადობის ნეიტრალური მოწმობის მფლობელი პირი  ნეიტრალური სამგზავრო დოკუმენტის მისაღებად უფლებამოსილ ორგანოში წარადგენს:

• პირადობის ნეიტრალური მოწმობას;
• 1 (ერთი) ფოტოსურათს დაბეჭდილი და ელექტრონული ფორმით;
• მომსახურების საფასურის გადახდის დამადასტურებელ ქვითარს;

 პირი რომელიც არ ფლობს პირადობის ნეიტრალურ მოწმობას,უფლებამოსილია გაიაროს რეგისტრაცია ფაქტობრივი საცხოვრებელი ადგილის მიხედვით.

გთხოვთ გაითვალისწინოთ !!! 

 ამ წესით გათვალისწინებული დოკუმენტები უფლებამოსილ ორგანოებს უნდა წარედგინოს მატერიალური ფორმით. დოკუმენტების წარმოდგენა აუცილებელი არ არის, თუ საქართველოს იუსტიციის სამინისტროს მმართველობის სფეროში მოქმედი საჯარო სამართლის იურიდიული პირის – სახელმწიფო სერვისების განვითარების სააგენტოს  მონაცემთა ელექტრონული ბაზა შეიცავს შესაბამის დოკუმენტში არსებულ ინფორმაციას.

ასევე აუცილებელია, სხვა სახელმწიფოში გაცემული (დამოწმებული) დოკუმენტები (გარდა პირადობის დამადასტურებელი დოკუმენტებისა) წარდგენილი იქნას სათანადო წესით ლეგალიზაციის ან აპოსტილით დამოწმების შემდეგ, საქართველოს კანონმდებლობით დადგენილი წესით დამოწმებულ თარგმანთან ერთად, თუ საქართველოს საერთაშორისო ხელშეკრულებით ან შეთანხმებით სხვა რამ არ არის გათვალისწინებული.

ნეიტრალური სამგზავრო დოკუმენტი გაიცემა :

• სრულწლოვან პირზე 10 წლის ვადით;
• 18 წლამდე პირზე – 3 წლის ვადით.

დამზადებული ნეიტრალური სამგზავრო დოკუმენტი გადაეცემა:

• პირადობის ნეიტრალური მოწმობის მფლობელ პირს, პირადად;
• არასრულწლოვნის კანონიერ წარმომადგენელს;
• მხარდაჭერის მიმღები პირის მხარდამჭერს;
•  მესამე პირს,  წარმომადგენლობითი უფლებამოსილების დამადასტურებელი დოკუმენტის საფუძველზე.
•  საქართველოში მოქმედ საერთაშორისო ორგანიზაციას, რომლისთვისაც პირადობის ნეიტრალური მოწმობის მიწოდების საკითხზე თანხმობა გამოხატა დაინტერესებულმა პირმა

ნეიტრალური სამგზავრო დოკუმენტის  საფასური 10 სამუშაო დღის ვადაში გაცემისათვის 45 ლარია.