პირადობის ნეიტრალური მოწმობა არის პირადობის დამადასტურებელი დოკუმენტი, რომელიც ადასტურებს პირის ვინაობას და მის საცხოვრებელ ადგილს საქართველოს ტერიტორიაზე.

ეს საინტერესოა! პირადობის ნეიტრალური მოწმობა აფხაზეთის ავტონომიურ რესპუბლიკაში ლეგიტიმურად მცხოვრებ პირთათვის იბეჭდება და ივსება ქართულ და აფხაზურ ენებზე, ხოლო ცხინვალის რეგიონში (ყოფილ სამხრეთ ოსეთის ავტონომიურ ოლქში) ლეგიტიმურად მცხოვრებ პირთათვის – ქართულ და ოსურ ენებზე.

პირადობის ნეიტრალური მოწმობა გაიცემა აფხაზეთის ავტონომიურ რესპუბლიკაში, ასევე ცხინვალის რეგიონში (ყოფილი სამხრეთ ოსეთის ავტონომიურ ოლქში) ლეგიტიმურად მცხოვრებ  პირებზე.

დაინტერესებულმა პირმა განცხადება პირადობის ნეიტრალური მოწმობის გაცემის მოთხოვნით უნდა წარადგინოს იუსტიციის სახლის ან სერვისების განვითარების სააგენტოს ნებისმიერ ტერიტორიულ სამსახურში.  

    განცხადება პირადობის ნეიტრალური მოწმობის მისაღებად შეიძლება წარადგენოს:

• სრულწლოვანმა, ქმედუნარიანმა პირმა პირადად;
• არასრულწლოვანის ერთ-ერთმა კანონიერმა წარმომადგენლმა;
• მხარდაჭერის მიმღები პირის მხარდამჭერმა;
• დაინტერესებული პირის წარმომადგენლმა, სანოტარო წესით დამოწმებული მინდობილობის საფუძველზე;
• დაინტერესებული პირის განცხადება ასევე შესაძლებელია წარადგინოს საქართველოში მოქმედმა საერთაშორისო ორგანიზაციამ.

შენიშვნა: პირადობის ნეიტრალური მოწმობის მიღების უფლება არა აქვს პირს, რომელზეც გაცემულია საქართველოს მოქალაქის პირადობის მოწმობა ან საქართველოს მოქალაქის პასპორტი.

პირადობის ნეიტრალური მოწმობის მისაღებად დაინტერესებულმა პირმა უფლებამოსილ ორგანოში უნდა წარადგინოს:

• პირადობის დამადასტურებელი ერთ-ერთი შემდეგი დოკუმენტი:

ა) ყოფილი საბჭოთა სოციალისტური რესპუბლიკების კავშირის პასპორტი;

ბ) შესაბამის ოკუპირებულ ტერიტორიაზე მოქმედი უკანონო ორგანოების (თანამდებობის პირების) მიერ გაცემული დაბადების ან პირადობის დამადასტურებელი დოკუმენტი;

•  ოკუპირებულ ტერიტორიაზე ლეგიტიმურად ცხოვრების დამადასტურებელი დოკუმენტი;
• 1 (ერთი) ფოტოსურათი დაბეჭდილი და ელექტრონული ფორმით;
• მომსახურების საფასურის გადახდის დამადასტურებელი ქვითარი.

გთხოვთ გაითვალისწინოთ !!! 

 ამ წესით გათვალისწინებული დოკუმენტები უფლებამოსილ ორგანოებს უნდა წარედგინოს მატერიალური ფორმით. დოკუმენტების წარმოდგენა აუცილებელი არ არის, თუ საქართველოს იუსტიციის სამინისტროს მმართველობის სფეროში მოქმედი საჯარო სამართლის იურიდიული პირის – სახელმწიფო სერვისების განვითარების სააგენტოს  მონაცემთა ელექტრონული ბაზა შეიცავს შესაბამის დოკუმენტში არსებულ ინფორმაციას.

ასევე აუცილებელია, სხვა სახელმწიფოში გაცემული (დამოწმებული) დოკუმენტები (გარდა პირადობის დამადასტურებელი დოკუმენტებისა) წარდგენილი იქნას სათანადო წესით ლეგალიზაციის ან აპოსტილით დამოწმების შემდეგ, საქართველოს კანონმდებლობით დადგენილი წესით დამოწმებულ თარგმანთან ერთად, თუ საქართველოს საერთაშორისო ხელშეკრულებით ან შეთანხმებით სხვა რამ არ არის გათვალისწინებული.

პირადობის ნეიტრალური მოწმობა გაიცემა:

• სრულწლოვან პირზე - 5 წლის ვადით;
• არასრულწლოვან (18 წლამდე) პირზე - 3 წლის ვადით.

დამზადებული პირადობის ნეიტრალური მოწმობა გადაეცემა:

• პირადობის ნეიტრალური მოწმობის მფლობელ პირს, პირადად;
• არასრულწლოვნის კანონიერ წარმომადგენელს;
• მხარდაჭერის მიმღები პირის მხარდამჭერს;
• მესამე პირს, წარმომადგენლობითი უფლებამოსილების დამადასტურებელი დოკუმენტის საფუძველზე.
•  საქართველოში მოქმედ საერთაშორისო ორგანიზაციას, რომლისთვისაც პირადობის ნეიტრალური მოწმობის მიწოდების საკითხზე თანხმობა გამოხატა დაინტერესებულმა პირმა.

პირადობის ნეიტრალური მოწმობის 10 სამუშაო დღის ვადაში  გაცემისათვის დადგენილი საფასურია -   10 ლარი.