სერვისი „ადმინისტრაციული ჯარიმა" გულისხმობს ადმინისტრაციული სამართალდარღვევის საქმეზე კანონიერ ძალაში შესული სასამართლო დადგენილების ან უფლებამოსილი ადმინისტრაციული ორგანოს(თანამდებობის პირის) ინდივიდუალური ადმინისტრაციულ-სამართლებრივი აქტის აღსრულებას  ადმინისტრაციული სახდელის სახით ჯარიმის დაკისრების ნაწილში(ადმინისტრაციული ჯარიმა).

• სერვისი განკუთვნილია  იმ ორგანიზაციებისათვის, რომლის გადაწყვეტილების საფუძველზედაც გაიცემა სააღსრულებო ფურცელი სახდელის სახით ჯარიმის დაკისრების შესახებ და შემდგომში წარმოებს აღსრულება.
• განმცხადებელს სერვისზე წარმოადგენს სააღსრულებო ფურცელის გამცემი ორგანო.

• შპს "სითი პარკის" ჯარიმა
• საპატრულო პოლიციის ჯარიმა
• პრობაციის ეროვნული სააგენტოს ჯარიმა
• სასამართლოში წესრიგის დამრღვევი პირის მიმართ ჯარიმა
• გარემოს დაცვის ინსპექციის ჯარიმა
• შპს. თბილისის სატრანსპორტო კომპანია-ავტობუსის ჯარიმა
• საქართველოს ეროვნული ბანკის ჯარიმა
• მერიის ზედამხედველობის სამსახურის ჯარიმა
• და სხვა კომპეტენტური ადმინისტრაციული ორგანოს მიერ დაკისრებული ჯარიმები

თუ თქვენს მიერ, კანონიერ ძალაში შესული დადგენილების შესრულება არ მოხდება კანონით დადგენილ ვადაში, მაშინ  დადგენილების გამომტანი ორგანო სააღსრულებო ფურცელს გადაააგზავნის აღსრულების ეროვნულ ბიუროში, დადგენილების იძულებითი აღსრულების მიზნით.

იმ შემთხვევაში, თუ თქვენს მიმართ ადმინისტრაციული სახდელის დადების შესახებ გამოტანილია რამდენიმე დადგენილება, თითეული აღსრულდება დამოუკიდებლად.

საქმის შემოსვლის შემდეგ იგი ნაწილდება კონკრეტულ აღმასრულებელზე, რომელიც 5(ხუთი) დღის ვადაში გადმოგიგზავნით წინადადებას გადაწყვეტილების ნებაყოფლობით შესრულების თაობაზე.

საქმის რეგისტრაციისთანავე მოხდება თქვენი რეგისტრაცია მოვალეთა რეესტრში (მოვალეთა რეესტრში პირი ხდება არაუზრუნველყოფილი მოთხოვნის შემთხვევაში), რაც გამოიწვევს შესაბამის რეესტრში რეგისტრაციას დაქვემდებარებული უძრავი და მოძრავი ქონების და სხვა არამატერიალური ქონებრივი სიკეთის განკარგვის (უფლებრივად დატვირთვის) უფლების შეზღუდვას.

პარალელურად აღმასრულებელი დაიწყებს თქვენი ქონების მოძიებას, აღწერას და მასზე ყადაღის დადებას ამ კანონით დადგენილი წესით, კერძოდ, მიმართავს შსს, საჯარო რეესტრს, სამეწარმეო რეესტრს, შემოსავლების სამსახურს და საქართველოში რეგისტრირებულ ყველა საბანკო დაწესებულებას შესაბამის ქონებაზე ყადაღის რეგისტრაციის მიზნით.

წინადადების ჩაბარებიდან 7(შვიდი) დღის ვადაში, მითითებული თანხა, უნდა ჩარიცხოთ წინადადებაში მითითებულ ანგარიშზე.

წინააღმდეგ შემთხვევაში, აღმასრულებელი უფლებამოსილია გამოიყენოს კანონით მინიჭებული იძულებითი  ღონისძიებები.

დადგენილება ადმინისტრაციული სამართალდარღვევის საქმეზე  შესასრულებლად სავალდებულოა ყველა ფიზიკური და იურიდიული პირისათვის.

იმ შემთხვევაში, თუ შვიდი დღის ვადაში თქვენს  მიერ  დაკისრებული ვალდებულება არ იქნება სრულად შესრულებული, აღმასრულებელი განახორციელებს დამატებით სააღსრულებო მოქმედებებს, როგორიცაა: თქვენს საბანკო ანგარიშზე განთავსებული თანხის საინკასო დავალებით ჩამოჭრა, თქვენი კუთვნილი ავტომანქანების ძებნა-დაკავებაზე გადაცემა, თქვენს საცხოვრებელ მისამართზე მოსვლა მოძრავი ნივთების აღწერა-დაყადაღების მიზნით და ამ ქონების აუქციონზე რეალიზაცია.

ქონებაზე აუქციონი ტარდება ყადაღის დადებიდან ერთი თვის ვადაში.

სააღსრულებო ფურცლის სააღსრულებო ბიუროში წარმოდგენის შემთხვევაში კრედიტორი (სახელმწიფო ბიუჯეტი) თავისუფლდება საფასურის წინასწარ გადახდისაგან და მისი ამოღება ხდება მოვალისგან აღსასრულებელ მოთხოვნასთან ერთად.

აღნიშნულ საქმეებზე აღსრულების საფასური განისაზღვრება შემდეგნაირად:

ა) 100 ლარამდე ოდენობის ჯარიმის/საურავის შემთხვევაში - ჯარიმის/საურავის თანხის 25%, მაგრამ არანაკლებ 20 ლარისა;

ბ) 100-დან - 200 ლარამდე ოდენობის ჯარიმის/საურავის შემთხვევაში - ჯარიმის/საურავის თანხის 20%, მაგრამ არანაკლებ 30 ლარისა;

გ) 200-დან - 500 ლარამდე ჯარიმის/საურავის შემთხვევაში - ჯარიმის/საურავის თანხის 10%, მაგრამ არანაკლებ 40 ლარისა;

დ) 500 ლარის და მეტი ჯარიმის/საურავის შემთხვევაში - ჯარიმის/საურავის თანხის 7 %, მაგრამ არანაკლებ 50 ლარისა.

გარდა მოვალეთა რეესტრში რეგისტრაციისა, თქვენი ქონების მოძიების მიზნით, აღმასრულებელი მიმართავს საჯარო რეესტრის ეროვნული სააგენტოს შესაბამის სარეგისტრაციო სამსახურს; შსს ინფორმაციული უზრუნველყოფისა და ანალიზის სამმართველოს; საქართველოში მოქმედ ყველა ბანკს. ასევე აღმასრულებლის მოთხოვნის შემთხვევაში მოთხოვნიდან 5 დღის ვადაში თქვენ ვალდებული ხართ  წარმოადგინოთ ქონებრივი ნუსხა. აღსრულება, შესაძლოა ასევე მიექცეს თქვენს საცხოვრებელ მისამართზე არსებულ მოძრავ ქონებაზე.

აღსრულების ეროვნული ბიურო უფლებამოსილია 12 თვემდე ვადით მოახდინოს თქვენს მიერ ვალდებულების შესრულების განწილვადება საქართველოს სახელმწიფო ბიუჯეტის სასარგებლოდ აღსასრულებელ საქმეებზე.

აღნიშნული მოთხოვნით მოვალემ წერილობითი განცხადება უნდა წარადგინოს იუსტიციის სახლში ან აღსრულების ეროვნულ ბიუროში.

ადმინისტრაციული ჯარიმის შესახებ მიმდინარე სააღსრულებო წარმოება შეწყდება თუ: 

• მოვალემ სრულად დაფარა დაკისრებული დავალიანება
• გაუქმდა შესაბამისი დარღვევებისათვის ადმინისტრაციული პასუხისმგებლობის დამდგენი აქტი
• გასაჩივრების საფუძველზე გაუქმდა დადგენილება;
• გარდაიცვალა ის პირი, რომლის მიმართაც იყო გამოტანილი დადგენილება
• სააღსრულებო წარმოების დაწყებიდან გავიდა 5 წელი.