დასაშვებია, სამეწარმეო საზოგადოების რეორგანიზაცია განხორციელდეს შემდეგი ფორმებით:

• სამეწარმეო საზოგადოების გარდაქმნა;
• სამეწარმეო საზოგადოებების შერწყმა (მიერთება ან გაერთიანება);
• სამეწარმეო საზოგადოების გაყოფა (დაყოფა ან გამოყოფა).

გარდაქმნა - პარტნიორებს შეუძლიათ ერთი სამართლებრივი ფორმის საწარმო გარდაქმნან სხვა სამართლებრივი ფორმის საწარმოდ. ასეთ შემთხვევაში, შესაბამისი გადაწყვეტილებით პარტნიორთა უფლებამოსილებები უნდა გადანაწილდეს ხელახლა, ამ სამართლებრივი ფორმისათვის დადგენილი შეზღუდვების გათვალისწინებით. გარდაქმნის შემდეგ საწარმო აგრძელებს არსებობას ახალი სამართლებრივი ფორმით.

გაერთიანება - უკვე არსებული ორი ან ორზე მეტი სამეწარმეო საზოგადოება შესაძლოა გაერთიანდეს ახალი სამეწარმეო საზოგადოების დაფუძნებით. ასეთ შემთხვევაში, გაერთიანებული სამეწარმეო საზოგადოებების რეგისტრაცია უქმდება და გაერთიანების შედეგად დაფუძნებულ სამეწარმეო საზოგადოებას სრულად გადაეცემა გაერთიანებული სამეწარმეო საზოგადოებების აქტივები და ვალდებულებები. გადაცემული აქტივებისა და ვალდებულებების სანაცვლოდ, გაერთიანებული (გაუქმებული) სამეწარმეო საზოგადოებების პარტნიორები მიიღებენ წილებს გაერთიანების შედეგად დაფუძნებულ სამეწარმეო საზოგადოებაში.

მიერთება - ერთი ან ერთზე მეტი სამეწარმეო საზოგადოება (შემდგომ − მიერთებული სამეწარმეო საზოგადოება) შესაძლოა მიუერთდეს სხვა სამეწარმეო საზოგადოებას (შემდგომ − შემძენი სამეწარმეო საზოგადოება). ასეთ შემთხვევაში, მიერთებული სამეწარმეო საზოგადოების რეგისტრაცია უქმდება და არსებობას განაგრძობს მხოლოდ შემძენი სამეწარმეო საზოგადოება. მიერთებული სამეწარმეო საზოგადოების აქტივები და ვალდებულებებ სრულად გადაეცემა შემძენ სამეწარმეო საზოგადოებას, რის სანაცვლოდაც მიერთებული (გაუქმებული) სამეწარმეო საზოგადოების პარტნიორები მიიღებენ წილებს შემძენ სამეწარმეო საზოგადოებაში.

დაყოფა ან გამოყოფა - დაყოფის დროს ხდება მეწარმე ან არასამეწარმეო (არაკომერციული) იურიდიული პირის დაშლა რამდენიმე ახალ სუბიექტად, რომლებიც წარმოადგენენ მის სამართალმემკვიდრეს, ხოლო რეორგანიზაციის შედეგად ამ საწარმოს რეგისტრაცია უქმდება;

გამოყოფის დროს კი მეწარმე ან არასამეწარმეო (არაკომერციულ) იურიდიულ პირს გამოეყოფა ახალი სუბიექტი და რეორგანიზებული სუბიექტიც აგრძელებს არსებობას.

გაყოფა (დაყოფა)

დაფუძნებით - სამეწარმეო საზოგადოება, შეიძლება დაიყოს ორ ან ორზე მეტ საწარმოდ და მათ საქმიანობა გააგრძელონ, როგორც დამოუკიდებელმა საწარმოებმა, საკუთარი სამართლებრივი ფორმით. ასეთ შემთხვევაში, დაყოფილი სამეწარმეო საზოგადოების რეგისტრაცია უქმდება, ხოლო მისი აქტივები და ვალდებულებები გადაეცემა დაყოფის შედეგად ახლად დაფუძნებულ ორ ან ორზე მეტ სამეწარმეო საზოგადოებას.

შეძენით - სამეწარმეო საზოგადოებამ შეიძლება მიიღოს გადაწყვეტილება თავისი აქტივებისა და ვალდებულებების ნაწილების უკვე არსებულ ორ ან ორზე მეტ სამეწარმეო საზოგადოებისთვის გადაცემის შესახებ. ასეთ შემთხვევაში, დაყოფილი სამეწარმეო საზოგადოების რეგისტრაცია უქმდება და არსებობას განაგრძობს, მხოლოდ შემძენი (უკვე არსებული) სამეწარმეო საზოგადოებები.

გაყოფა (გამოყოფა)

დაფუძნებით - სამეწარმეო საზოგადოებამ შეიძლება მიიღოს გადაწყვეტილება, თავისი აქტივებისა და ვალდებულებების ნაწილის უკვე არსებული ერთი ან ერთზე მეტი სამეწარმეო საზოგადოებისთვის გადაცემის შესახებ. ასეთ შემთხვევაში, რეორგანიზაციის პროცესში მონაწილე ყველა სამეწარმეო საზოგადოება აგრძელებს არსებობას.

შეძენით - სამეწარმეო საზოგადოებამ შეიძლება მიიღოს გადაწყვეტილება, თავისი აქტივებისა და ვალდებულებების ნაწილის გადაცემით, ერთი ან ერთზე მეტი ახალი სამეწარმეო საზოგადოების გამოყოფის შესახებ. ასეთ შემთხვევაში, რეორგანიზაციის პროცესში მონაწილე ყველა სამეწარმეო საზოგადოება (როგორც გამოყოფილი, ასევე ის საზოგადოება რომლისგანაც მოხდა გამოყოფა) აგრძელებს არსებობას.

პარტნიორებს შეუძლიათ ერთი სამართლებრივი ფორმის საწარმო გარდაქმნან სხვა სამართლებრივი ფორმის საწარმოდ. ასეთ შემთხვევაში, შესაბამისი გადაწყვეტილებით პარტნიორთა უფლებამოსილებები უნდა გადანაწილდეს ხელახლა, ამ სამართლებრივი ფორმისათვის დადგენილი შეზღუდვების გათვალისწინებით. გარდაქმნის შემდეგ საწარმო აგრძელებს არსებობას ახალი სამართლებრივი ფორმით.

გარდაქმნილ სამეწარმეო საზოგადოებაში პარტნიორის წილი უნდა იყოს იმ წილის პროპორციული, რომელიც მას ჰქონდა წინა სამეწარმეო საზოგადოებაში. სხვა შემთხვევაში სამეწარმეო საზოგადოების პარტნიორებმა გარდაქმნის შესახებ გადაწყვეტილება ერთხმად უნდა მიიღონ.

გარდაქმნის შესახებ სამეწარმეო საზოგადოების პარტნიორთა გადაწყვეტილება უნდა გამოქვეყნდეს. გამოქვეყნებად მიიჩნევა ფაქტის თაობაზე ინფორმაციის ან დოკუმენტის მარეგისტრირებელი ორგანოს ერთიან ელექტრონულ პორტალზე განთავსება.

სამეწარმეო საზოგადოების გარდაქმნის რეგისტრაციის შესახებ განცხადება, ხელმძღვანელმა ორგანომ, მარეგისტრირებელ ორგანოს შეიძლება წარუდგინოს გარდაქმნის შესახებ სამეწარმეო საზოგადოების პარტნიორთა გადაწყვეტილების გამოქვეყნებიდან 1 თვის შემდეგ.

1 თვიანი ვადის დაცვა სავალდებულო არ არის, თუ ყველა პარტნიორი წერილობით უარს განაცხადებს გასაჩივრების უფლების გამოყენებაზე, რაც უნდა დამოწმდეს ამ კანონით წესდებაზე ხელმოწერის დამოწმებისთვის დადგენილი წესით.

სამეწარმეო საზოგადოების გარდაქმნის რეგისტრაციის შესახებ, მარეგისტრირებელ ორგანოში წარდგენილ განცხადებას თან უნდა ერთვოდეს:

• სამეწარმეო საზოგადოების პარტნიორთა გადაწყვეტილება გარდაქმნის შესახებ;
• წესდების პროექტი;
• გადაწყვეტილება ხელმძღვანელი პირების დანიშვნისა და სამეთვალყურეო საბჭოს წევრების არჩევის შესახებ, თუ მათი არსებობა აუცილებელია შესაქმნელი სამეწარმეო საზოგადოებისთვის;
• მონაცემები პარტნიორთა ვინაობისა და გარდაქმნილ სამეწარმეო საზოგადოებაში (გარდა კოოპერატივისა და სააქციო საზოგადოებისა) მათი წილების შესახებ.
• ყველა   სხვა დოკუმენტი და მონაცემი, რომლებიც საჭიროა ახალი სამართლებრივი ფორმის სამეწარმეო საზოგადოების დაფუძნებისთვის.

რეორგანიზაციის პროცესში მონაწილე ყველა უკვე რეგისტრირებული სამეწარმეო საზოგადოების ხელმძღვანელი ორგანო ვალდებულია შეადგინოს შერწყმის/გაყოფის გეგმა რომელსაც უნდა ერთვოდეს:

• შემძენი სამეწარმეო საზოგადოების წესდებაში ცვლილებების პროექტი (მიერთების ან შეძენით გაყოფის შემთხვევაში);
• გაერთიანებული სამეწარმეო საზოგადოების/ახლად დაფუძნებული სამეწარმეო საზოგადოების წესდების პროექტი (გაერთიანების ან დაფუძნებით გაყოფის შემთხვევაში).

შერწყმაში/გაყოფაში მონაწილე ყოველი სამეწარმეო საზოგადოების ხელმძღვანელობაზე უფლებამოსილი ორგანო ვალდებულია გამოაქვეყნოს შერწყმის/გაყოფის გეგმის პროექტი ან განათავსოს ის სამეწარმეო საზოგადოების ვებგვერდზე იმ საერთო კრებამდე 30 დღის განმავლობაში, რომელმაც უნდა დაამტკიცოს შერწყმის/გაყოფის გეგმა. შერწყმის/გაყოფის გეგმის პროექტი უფასოდ უნდა იყოს ხელმისაწვდომი.

შერწყმის/გაყოფის რეესტრში რეგისტრაციის შესახებ განცხადება მარეგისტრირებელ ორგანოს უნდა წარედგინოს შერწყმის/გაყოფის გეგმის გამოქვეყნებიდან 1 თვის შემდეგ. ამ ვადის დაცვა სავალდებულო არ არის, თუ ყველა პარტნიორი წერილობით უარს განაცხადებს შესაბამისი უფლების გამოყენებაზე.

განმცხადებელი სერვისზე შეიძლება იყოს უშუალოდ დაინტერესებული პირი (რეორგანიზაციის პროცესში მონაწილე სუბიექტის პარტნიორი/დამფუძნებელი, ხელმძღვანელობასა ან წარმომადგენლობაზე უფლებამოსილი პირი) ან დაინტერესებული პი­რის წარმომად­გე­ნე­ლი.

მეწარმე და არასამეწარმეო (არაკომერციული) იურიდიული პირის რეორგანიზაციის  დაწყების რეგისტრაციისთვის მიმართეთ ნებისმიერ იუსტიციის სახლს, საზოგადოებრივ ცენტრს ან საჯარო რეესტრის ეროვნული სააგენტოს ნებისმიერ ტერიტორიულ სამსახურს.                                 

 დაინტერესებულმა პირმა უნდა წარმოადგინოს განცხადება;

სამეწარმეო საზოგადოების გარდაქმნის შესახებ განცხადებას უნდა ერთოდეს შემდეგი დოკუმენტები:

• სამეწარმეო საზოგადოების პარტნიორთა გადაწყვეტილება გარდაქმნის შესახებ;

• „მეწარმეთა შესახებ“ საქართველოს კანონის 61-ე მუხლის მე-5 პუნქტის შესაბამისად სამეწარმეო საზოგადოების პარტნიორთა გადაწყვეტილებისთვის დართული დოკუმენტები;

• მონაცემები პარტნიორთა ვინაობისა და გარდაქმნილ სამეწარმეო საზოგადოებაში (გარდა კოოპერატივისა და სააქციო საზოგადოებისა) მათი წილების შესახებ;

• სამეწარმეო საზოგადოებამ სამეწარმეო საზოგადოების გარდაქმნის შესახებ   განცხადებასთან   ერთად   უნდა   წარადგინოს   ყველა   სხვა დოკუმენტი და მონაცემი, რომლებიც საჭიროა ახალი სამართლებრივი ფორმის სამეწარმეო საზოგადოების დაფუძნებისთვის.
• დაინტერესებული პირის პირადობის დამადასტურებელი დოკუმენტი;

• საქართველოს მთავრობის დადგენილებით გათვალისწინებული მომსახურების საფასურის გადახდის დამადასტურებელი დოკუმენტი;

შერწყმის/გაყოფის რეესტრში რეგისტრაციის შესახებ განცხადებას უნდა დაერთოს შემდეგი დოკუმენტები:

• შერწყმის/გაყოფის გეგმა;

• ცვლილებები შემძენი სამეწარმეო საზოგადოების წესდებაში ან ახლად დაფუძნებული სამეწარმეო საზოგადოების წესდება;

• საერთო კრების გადაწყვეტილება, რომლითაც დამტკიცდა შერწყმის/გაყოფის გეგმა;

• არსებობის შემთხვევაში − გადაწყვეტილება ახლად დაფუძნებული სამეწარმეო საზოგადოების ხელმძღვანელი პირებისა და სამეთვალყურეო საბჭოს წევრების არჩევის შესახებ;

• სახელმწიფო დაწესებულების ან სხვა კომპეტენტური ორგანოს თანხმობა შერწყმაზე/გაყოფაზე, თუ ეს საქართველოს კანონმდებლობით არის გათვალისწინებული.

• თუ შერწყმა/გაყოფა იწვევს ახალი სამეწარმეო საზოგადოების დაფუძნებას, შერწყმის/გაყოფის რეესტრში რეგისტრაციის შესახებ განცხადებას უნდა დაერთოს ყველა სხვა დოკუმენტი და მონაცემი, რომლებიც საჭიროა შესაბამისი სამართლებრივი ფორმის სამეწარმეო საზოგადოების დაფუძნებისთვის.

• არსებობის შემთხვევაში − დამოუკიდებელი აუდიტორის ანგარიში;

• არსებობის შემთხვევაში − შერწყმის/გაყოფის ანგარიში;

• დაინტერესებული პირის პირადობის დამადასტურებელი დოკუმენტი;

• საქართველოს მთავრობის დადგენილებით გათვალისწინებული მომსახურების საფასურის გადახდის დამადასტურებელი დოკუმენტი;

დაინტერესებული პირის წარმომადგენლის (მინდობილი პირის) მიერ მიმართვის შემთხვევაში, ზემოთ აღნიშნულ დოკუმენტაციასთან ერთად დამატებით წარმოდგენილ უნდა იქნას:

• წარმომადგენლის პირადობის დამადასტურებელი დოკუმენტი (პირადობის მოწმობა, პასპორტი, ბინადრობის მოწმობა ან სხვა);

• სათანადო წესით შედგენილი და დამოწმებული წარმომადგენლობის დამადასტურებელი დოკუმენტი (მინდობილობა ან სხვა);

სარეგისტრაციო დოკუმენტი შესაძლებელია დამოწმებულ იქნეს როგორც სანოტარო წესით, ისე იუსტიციის სახლის,საზოგადოებრივი ცენტრის ან საჯარო რეესტრის ეროვნული სააგენტოს უფლებამოსილი თანამდებობის პირის მიერ (გარდა კანონმდებლობით გათვალისწინებული შემთხვევისა).

კონკრეტულ შემთხვევაში შეიძლება დამატებით მოთხოვნილ იქნეს ნებისმიერი დო­კუ­მენტი ან ინფორმაცია, რაც აუცილებელია გადაწ­ყვე­ტი­ლების მისაღებად.

სარეგისტრაციო წარმოების ვადა და საფასური:

• მომსახურების საფასური განისაზღვრება რეორგანიზაციის შედეგად არსებული სუბიექტების რაოდენობის შესაბამისად,ერთეულ სუბიექტზე ერთი სამუშაო დღის ვადაში -200 ლარი, ხოლო განცხადების შეტანის დღეს ერთეულ სუბიექტზე– 400 ლარი;
• სარეგისტრაციოდ წარდგენილ გარიგებაზე მხარეთა ხელმოწერების დადასტურება – რეგისტრაციის საფასურს ემატება 7 ლარი;
• ამონაწერის ინგლისურ ენაზე მომზადება – 26 ლარი (აღნიშნული საფასური ემატება იმ მომსახურების საფასურს, რომელთან ერთადაც მოთხოვნილია ინგლისურენოვანი ამონაწერის მომზადება);